Dichal
Gwelout a rit ar vagig wenn
A vorede e korn al lenn,
A-dreñv ar c'horz, e-mesk ar broen,
Nerzhus ha flamm evel ul loen ;
Ar paotrig koant en deus kavet ar vag,
Stignet ar gouelioù ha brevet ar stag,
Sellit outañ o vleinañ 'tal ar stur,
O tridal gant al lorc'h, seder ha fur.
Emañ o vont dre 'n avel hag al lanv
Evel un den kollet gantañ e anv.
Perak 'ta bezañ dilezet ar porzh,
Ar goudor sioul, an elestr hag ar c'horz ?
War gern an tonn e vag a vrall,
En amzer vat, en amzer fall ;
'Mañ-eñ o vont da redek bro
A-dreuz ar bed, ha tro-ha-tro ?
in "Barzhonegoù", Kenan Kongar, Al Liamm, 1982
/https%3A%2F%2Fassets.over-blog.com%2Ft%2Fcedistic%2Fcamera.png)